CEIR पोर्टलच्या माध्यमातून १४ हरवलेले व चोरीस गेलेले मोबाईल शोधून नागरिकांना केले परत; २ ते २.५० लाखांचा मुद्देमाल हस्तगत
अंबाजोगाई प्रतिनिधी :–
दिवाळीच्या सणाच्या पूर्वसंध्येला अंबाजोगाई शहर पोलिसांनी नागरिकांना अनोखी भेट देत त्यांच्या चेहऱ्यावर आनंद फुलवला आहे. हरवलेले आणि चोरीस गेलेले मोबाईल परत मिळण्याची आशा सोडून दिलेल्या नागरिकांसाठी अंबाजोगाई शहर पोलिसांनी विशेष प्रयत्न करून तब्बल १४ मोबाईल फोन शोधून काढत ते संबंधित नागरिकांच्या स्वाधीन केले. या मोबाईलची अंदाजे किंमत २ ते २.५० लाख रुपये असून पोलिसांच्या या कामगिरीचे नागरिकांकडून कौतुक होत आहे.
पोलीस अधीक्षक नवनीत कावत यांच्या मार्गदर्शनाखाली यशस्वी मोहीम
बीड जिल्ह्याचे पोलीस अधीक्षक श्री. नवनीत कावत, अपर पोलीस अधीक्षक श्रीमती चेतना तिडके आणि सहाय्यक पोलीस अधीक्षक श्री. ऋषिकेश शिंदे यांच्या मार्गदर्शनाखाली अंबाजोगाई शहर पोलीस ठाण्याच्या पथकाने ही विशेष मोहीम राबवली. केंद्र सरकारच्या CEIR (Central Equipment Identity Register) पोर्टलचा प्रभावी वापर करून चोरीस गेलेले तसेच हरवलेले मोबाईल शोधण्याची प्रक्रिया राबविण्यात आली.
या तांत्रिक प्रक्रियेद्वारे मोबाईल फोनचा शोध घेण्यात पोलिसांना यश आले. त्यानंतर एकूण १४ मोबाईल फोन हस्तगत करून दिवाळीच्या पूर्वसंध्येला ते संबंधित नागरिकांना परत करण्यात आले. अनेक दिवसांपासून हरवलेल्या मोबाईलची प्रतीक्षा करणाऱ्या नागरिकांना ऐन दिवाळीत आपला मोबाईल पुन्हा मिळाल्याने त्यांच्या आनंदाला पारावार उरला नाही.
पोलीस कर्मचाऱ्यांच्या मेहनतीला यश
या संपूर्ण शोधमोहिमेत CEIR पोर्टलचे कामकाज पाहणारे पोलीस उपनिरीक्षक रमेश घुले आणि पोलीस अंमलदार रवी कुमार केंद्रे यांनी विशेष परिश्रम घेतले. तांत्रिक माहितीच्या आधारे मोबाईलचा शोध घेण्यासाठी त्यांनी सातत्याने प्रयत्न केले. त्यांच्या मेहनतीमुळे १४ नागरिकांना त्यांचे हरवलेले मोबाईल पुन्हा मिळवून देणे शक्य झाले.
हरवलेले मोबाईल असल्यास पोलिसांशी संपर्क साधण्याचे आवाहन
ज्या नागरिकांचे मोबाईल फोन हरवले आहेत किंवा चोरीस गेले आहेत, त्यांनी निराश न होता तात्काळ अंबाजोगाई शहर पोलीस ठाण्यात तक्रार नोंदवावी. तक्रार देताना मोबाईलचा IMEI क्रमांक, मोबाईल खरेदीचे बिल (उपलब्ध असल्यास), मोबाईल क्रमांक तसेच इतर आवश्यक माहिती सोबत आणावी. CEIR पोर्टलच्या माध्यमातून हरवलेले व चोरीस गेलेले मोबाईल शोधण्यासाठी पोलीस विभागाकडून प्रयत्न करण्यात येतील.
नागरिकांची मालमत्ता सुरक्षित ठेवणे, हरवलेल्या वस्तू शोधून त्यांना न्याय मिळवून देणे आणि पोलिसांवरील जनतेचा विश्वास अधिक दृढ करणे, हेच बीड जिल्हा पोलिसांचे ध्येय असल्याचे या उपक्रमातून पुन्हा एकदा अधोरेखित झाले आहे.
दिवाळीच्या आनंदात नागरिकांना हरवलेले मोबाईल परत मिळवून देणाऱ्या अंबाजोगाई शहर पोलिसांच्या या स्तुत्य उपक्रमाचे सर्वत्र कौतुक होत आहे. BEED POLICE पोलीस ठाणे अंबाजोगाई शहर
About The Author
